Datorren ostiralean, hilaren 11n izango da 2019ko neguko lehen kontzertua Herri Antzokian. Olatz Salvadorrek eta eMe-k joko dute, 22:30etan hasita. Sarrerak salgai daude herriko kioskoan, 6 euroan, eta egunean bertan ere erosi ahal izango dira, 8 euroan.
Urtezahar egunez, San Silvestre krosa izango da gaur, 12:00etan hasita. 10:45etik 11:45era bitarte eman ahal izango da izena. Sei lasterketa izango dira guztira, adinka sailkatuta. Herrikoek nahiz kanpokoek parte hartu ahal izango dute, baina sariak herritarrei emango zaizkie, eta, horretarako, errolda hartuko da kontuan.
Abenduaren 28an izango da Moko zorrotza antzezlana Herri Antzokian, Txalo konpainiaren eskutik. Aitziber Garmendia eta Jon Plazaola dira antzezlaneko aktoreak. Bi saio izango dira: 19:30etan bata, eta 22:30etan bestea. 10 euroan daude salgai sarrerak, udaletxean.
Abenduaren 14an izango da udazkeneko azken kontzertua Legorretako Herri Antzokian: EtsaiakEroak, Irkaia eta Trance taldeek joko dute, 22:30etan hasita. Sarrerak leihatilan egongo dira salgai, 5 euroan, kontzertua hasi aurretik.
Abenduaren 3a da gaur, Euskararen Nazioarteko Eguna; aurten, gainera, Euskaraldiaren amaiera ere badakar egun honek. Azaroaren 23an hasi zen, eta, 11 egunez, euskaraz hitz eginez eta entzunez ibili dira milaka eta milaka ahobizi eta belarriprest Euskal Herri osoan, bai eta Legorretan ere, jakina.
Ongizate lantaldeak antolatuta, aurten abenduaren 29an izango da elkartasun azoka, 11:00etatik 14:00etara; hori dela eta, egun horretan saltzeko materiala eskatu nahi dizuegu.
Amaia Elizagoien kontalariak arazoak izan ditu errepidean, Legorretarako bidean, eta ezingo da iritsi 18:00etarako. Horregatik, bertan behera geratuko da saioa.
Patxi Ezkiagaren antologia poetikoa argitaratu berri du Balea Zuria argitaletxeak, Blues bat bizitzari, Legorretako Udalaren laguntzaz, eta aurkezpena izango da ostiral honetan, 19:00etan, Herri Antzokian.
Asteazkenean, hilaren 28an, aurtengo azken ipuin-kontaketa saioa izango da. 2018ko Ipuinaren Ordua egitasmoa amaitzeko, kontaketa musikatua izango da, Txanpon baten truke, Ameli ipuinen jostunaren eskutik.
Igandea, azaroak 25, Indarkeria Matxistaren Aurkako Eguna da, eta horren inguruko ekintzak izango dira goizean.
Bihar, larunbata, hilak 24, gaztaina jana eta musika eskolaren emanaldia izango dira. 18:30etan hasita, herriko frontoian. Gaztainak guraso elkarteak prestatu eta salduko ditu, ohi bezala, eta musika eskolaren emanaldia, berriz, Santa Zezilia ospatzeko izango da. Horri lotuta, gaur iluntzean, 19:30etan, Elekun abesbatza ibiliko da herriko kaleetan kantari.
