Haizea Aranak, Oihana Aranak, Aner Peritzek eta Leire Vargasek eRRe. Aldarri bat bertsoz emanaldia aurkeztuko dute bihar, abenduaren 30ean, Legorretan. Herri Antzokian izango da, 19:00etan, doan (16 urtetik gorakoentzat).
Ostiralean, abenduaren 30ean, marranita txapelketa izango da Aldapa Haundi, Bilkoin eta Jota Kea elkarteek antolatuta. Txapelketa 23:00etan hasiko da eta izen ematea aurretik egingo da 5 eurotan.
Bihar, abenduaren 28an, Perli eta Koxkolok emanaldia eskainiko dute Kultur Etxean 7 urtez azpikoentzat. 'Abentura zirraragarriak' titulutzat daraman ikuskizun honetan, Perlik eta Koxkolok bidaia liluragarri bat egitera eramango gaituzte. Musikak eta dantzak lagunduta, leku zoragarriak eta oso lagun bitxiak aurkituko dituzte munduan zehar, eta ilargira ere iritsiko dira. Emanaldia, 18:00etan hasiko da.
Potx eta Lotx pailazoek emanaldia eskainiko dute urtarrilaren 4an Antzokian. 'Aireportuan' titulua duen saioa 18:00etan hasiko da eta sarreraren prezioa 3 eurokoa izango da; bi urtez azpikoek ez dute ordaindu beharko. Sarrerak eskuragai jarriko dira bihartik, abenduaren 27tik, aurrera udaletxean.
Datorren asteartean, hilaren 27an, Ikusezinak, erbesteratuen haurrak liburua aurkeztuko du Miren Azkarate idazleak. Aldapa Haundi elkartean izango da aurkezpena, 19:00etan. Haur maletadunen, hau da, iheslari nahiz deportatuen seme-alaben bizitza jaso du Azkaratek, zortzi testigantzatan oinarrituta. Tartean, berak bizi izandakoaren berri eman du, bere aita ere iheslari izan zelako.
Bihar, abenduak 24, Eguberri bezpera, Olentzero etorriko da Legorretara, eta kantuan ibiliko dira herritarrak. Hauexek dira iragarritako ordutegiak:
Igandean, abenduaren 18an, 'La visita' filma ikusteko aukera izango dute herriko gaztetxoek (zehazki, 13 urtetik gorakoei zuzendutako dilma da). Filma, beti bezala, 17:00etan hasiko da eta sarrera doakoa da.
Legorretako Udalaren Gizarte Ongizate Sailak Legorretako Elkartasun azoka antolatu du aurten ere. Igandean, abenduaren 18an izango da 11:00etatik 14:30era bitartean. Bertan, aurreko urteetan gertatu den antzera, jostailuak, jantziak, liburuak... erosteko aukera izango dute gerturatzen direnek. Aurtengoan, biltzen den dirua Aspanogi elkartearentzat izango da.
Emakumeak Mugimenduan ikastaroa emakumeentzako sormen eta zaintza espazio bat da. Bertan, gorputz kontzientzia landuko da, norberaren mugimenduak ezagutu, norberaren erritmoekin jolastu, dantzak sortu... Dantza eta mugimendu inprobisazioa izango dira ikastaro honen oinarria. Hain zuzen ere, dantza mugimendu terapian oinarritutako saioak izango dira. Hasieran dinamika gidatuekin eta prozesua aurrera doan heinean libreagoak izan daitezkeenak, taldearen erritmoaren arabera.
Datorren ostiralean, abenduaren 23an, bertso saioa izango da Antzokian. Bertan, herriko bertsolaria entzuteko aukera izateaz gain, Euskal Herriko bertsolari txapelketan izango diren bi bertsolari entzuteko aukera ere izango dugu, besteak beste. Honako bertsolariak izango ditugu gurean: Alaia Martin, Oihana Iguaran, Sustrai Colina, Iker Zubeldia eta Odei Lopez legorretarra.
