Urriaren 9ra bitarte zabalik dago haur eskolan izena emateko epea, 2018an eta 2019an jaiotako haurrentzat.

Urritik ekainera bitarte, hainbat jarduera izango dituzte herriko adinekoek, Legorretako Udalak eskainita.

Herritar guztiei jakinarazten zaie irailaren 30etik urriaren 7ra bitartean (biak barne) udal bulegoetan ikusgai egongo direla hautesleen zerrendak, goizeko 08:00etatik eguerdiko 14:00etara.

Erorikoen prebentziorako tailerra antolatu dute gizarte zerbitzuek. Ostegunean izango da, 11:00etan, udaletxeko areto nagusian.

Aurrerantzean, hala eskatzen duenak aukera izango du etxean hauteskunde propagandarik ez jasotzeko. Udaletxera bertaratu eta eskaera orri bat bete behar da; urriaren 4a izango da azken eguna.

Ipuinaren Ordua egitasmoaren udazkeneko saioak izango dira irail, urri eta azaroan. Datorren asteazkenean, hilaren 25ean, Ixabel Agirresarobe ipuin kontalariak Joxe Moxe Kitarraren etxean kontatutakoak saioa eskainiko du, kultur etxean, arratsaldeko seietan.

Irailaren 28an izango da garagardo azoka, eguerdian hasita. Aldapa Haundi elkarteak XII. urtez antolatu du, eta bazkaria izango da aurten. 12:30etan irekiko dute azoka, eta 13:30etan hasiko dira bazkariak ematen. Bazkalondoan, berriz, Xuxuma taldearen kontzertua izango da.

Udaleko gizarte zerbitzuek deialdia egin dute Guraso Eskolan izena emateko. Ugaro herri eskolako eta haur eskolako gurasoentzat izango dira saioak, urritik maiatzera bitarte, hilean behin, astelehenetan, 18:00etatik 19:30etara. Olatz Berastegik gidatuko ditu saioak, Harremanak elkarteko kideak.

Legorretako Udalak lan eskaintza bat abiatu du Eusko Jaurlaritzaren Enplegua Sustatzeko Programaren barruan. Lanbideren webgunean argitaratu dute deialdia.

Ekogunearen baratze parkeen sareko parte da Legorretako baratze parkea, eta hainbat zerbitzu eskaintzen ditu. Tartean, Furgobaratza. Hilean behin izaten da baratzeetan, aholkuak eman, zalantzak argitu eta praktika egokiak proposatzeko. Gainera, urtean lau aldiz tailer ezberdinak eskaintzen ditu. Ostiralean izango da urteko laugarren tailerra: Neguko barazki exotikoak. 18:00etatik 19:30etara izango da tailerra, eta, gainera, barazkiak oparituko dira. Baratzeetako kideentzat zein interesa duten herritar guztientzat izango da, doan.

Ikastaroak, titulazioak, mintzapraktikak... denetariko egitasmoak lagunduko ditu udalak. Beheko taulan duzue informazioa.

Aldaieta elkarteak jubilatuen astea antolatu du bere kideentzat. Asteartean, irailak 10, bingoan ibiliko dira 18:00etan, eta, 19:30etan, patata-tortilla dastaketa egingo dute. Ostiralean, berriz, hilaren 13an, VIII. ibilaldi neurtua egingo dute, 18:00etan hasita. Taldeka aterako dira, hiruzpalau pertsonako taldeetan, eta bi itzuli egingo dituzte, bost kilometro guztira. Bukatutakoan, txorizo dastaketa izango dute.