Datorren asteazkenean, apirilaren 6an, Biziolako kideek kooperatiba aurkeztuko dute Legorretako udaletxean, 18:00etan.

Biziola irabazi asmorik gabeko eta gizarte ekimeneko kooperatiba bat da, Goierri eskualdeko herritarrak, ekonomia sozial eraldatzaileko eragileak eta bestelako erakundeak saretu nahi dituena. Goierri burujabeago, iraunkorrago eta orekatuago baten bidean proiektu zehatzak martxan jartzeko.

Biziola fabrika ere ireki dute, Lazkaon, eta bertan izan zen aurkezpen nagusia, martxoaren 12an: jadanik martxan dituzten proiektuak eta fabrikako txokoak aurkeztu zituzten:

• Elikadura burujabetzaren bidean, produktuak bildu eta banatzeko logistikarako gunea.

• Produktuak eskuratu eta agroekologiaren bidean hezi eta hazteko espazio bat.

• Produktuak eraldatzeko espazio bat, hasiera batean, gozogintzako obradore bat jasoko duena.

• Plaza ireki bat, hitzaldiak, tailerrak, mahai-inguruak, antzerkiak, kontzertu txikiak… egiteko. Mundu bizigarriagoak sentitzeko, ezagutzeko eta bizitzeko aukera emango duena.

• Ekonomia Sozial Eraldatzailean lanean diharduten proiektuentzako lanerako espazioak eta proiektu berrien haztegia.

Hori guztia martxan jartzeko "ahalegin ekonomikoa handia" izango dela jakinarazi dute kooperatiba sustatu duten kideek, eta, proiektu horiek aurrera eramateko, bazkidetze kanpaina abiatu dute: maiatzaren 14rako 500 bazkide lortzeko erronka jarri dute.