Legorretako Udalak ondoeza adierazi nahi du azken egunetan edukiontzietatik kanpo hainbat hondakin agertu direlako. Pertsona batzuen jokabide txarraren ondorioz, zaborra pilatu da edukiontzien inguruan, eta, beraz, gainerako herritarrekiko errespetua izatea eskatu du udalak.

Azpiko argazkietan ikus daitekeenez, Bidarte auzoko edukiontzien inguruan hondakin elektronikoak eta bestelakoak utzi dira. Errepide nazionalekoei dagokienez, koltxoi bat kanpoan utzi dela ikus daiteke. Hain zuzen ere, hondakin horien bilketa hileko bigarren astelehen gauean egiten da, eta ordurako utzi behar dira. Egun horretara arte itxaron nahi ez bada, herritarrek Tolosako, Ordiziako eta Beasaingo garbiguneak eskura dituzte, eta asteko edozein egunetan eraman ditzakete (igande eta jaiegunetan izan ezik).

Kudeaketa txar honen ondorioz, udal-langileek beren gain hartu behar dituzte hondakin horiek garbigunera eramanez, horrek dakarren lan gehigarriarekin. Legorretako Udalak hondakinen kudeaketa egokia duen herri garbi baten alde lan egiten du, baina horretarako funtsezkoa da herritarren lankidetza eta errespetuzko jokabidea.