SATTO kultura elkarteak Moonshine Wagon taldearen kontzertua antolatu du ostiral honetarako, azaroak 17. Herri Antzokian izango da, eta 19:30ean hasiko da. Sarrerak jubilatuen elkartean zein esteka honetan eros daitezke 10 euroren truke; egunean bertan, aldiz, 13 eurotara igoko da.

Moonshine Wagon Euskal Herriko heavy-bluegrass talde bat da. 2013ko udazkenean sortu zen Gasteizen, kalean dibertimenduz jotzeko elkartzen zirenean, eta, horretarako asmorik gabe, publikoaren gorespenez, etengabe hazi dira. Harrezkero, Europa osoko eta Amerika zati bateko areto eta jaialdietan dabiltza, modu autogestionatuan, ‘Wagon’ autokarabanan, gehien gustatzen zaiena egiten. Soka-laukote batek osatzen du banda, eta biolina, mandolina, banjoa, gitarra eta kontrabaxua tartekatzen dituzte batez ere, eta batzuetan kolaborazioak izaten dituzte.