Bueltan dira reggae doinuak herrira. Beste urte batez antolatu da Legoreggae jaialdia, eta aurtengo edizioa larunbat honetan izango da, martxoaren 23an. Hori gutxi balitz, Korrikarekin bat egingo du; lekukoa eguerdi partean iritsiko da Legorretara eta reggae doinuak arratsaldetik aurrera entzungo dira.
Jaialdiak 22:00etan ekingo badio ere, kaleak 18:00etatik aurrera alaituko dituzte Marabiyak Sound-en kalejira batekin. Eta gau partean Harripila kiroldegian elkartuko dira Lilibat Sound, Steady Rockets, The Titanians eta Samory I & Mortimer Meets Tippy I taldeak.
Sarrerak oraindik salgai daude eta herriko tabernetan zein plataforma digital honetan eskura daitezke 15 euroren truke.
